डॉ. बाबासाहेब आंबेडकर यांनी महाडच्या चवदार तळ्यावर दलितांसह पाणी प्राशन करण्यासाठी केलेल्या ऐतिहासिक सत्याग्रहाची तुलना फ्रेंच राज्यक्रांतीशी केली जाते. त्या समता संगराचा इतिहास विद्यालय आणि महाविद्यालयीन अभ्यासक्रमात समाविष्ट करण्यात यावा, अशी मागणी पुढे आली आहे. येत्या शुक्रवारी २० मार्चपासून महाड क्रांतीचा शताब्दी महोत्सव राज्यात सुरू होत आहे. त्याचा प्रारंभिक समारंभ मुंबईच्या पत्रकार भवनात नुकताच पार पडला. मुंबई मराठी पत्रकार संघ आणि समता अभियान यांनी संयुक्तरीत्या आयोजित केलेल्या त्या समारंभात ही मागणी पहिल्यांदा करण्यात आली. त्या मागणीला उपस्थित मान्यवर आणि श्रोता समुदायाने टाळ्यांचा जोरदार कडकडाट करत पाठींबा व्यक्त केला.
शैक्षणिक प्रगतीत जेमतेम असलेला इथला चैतन्य भंडारे हा एक दलित तरुण दोन यशस्वी कंपन्या थाटून जपानमध्ये मोठा उद्योजक बनतो, ही डॉ.बाबासाहेब आंबेडकर यांची क्रांती आहे, असे पत्रकार संघाचे अध्यक्ष संदीप चव्हाण यांनी सांगितले. ही शताब्दी साजरी होत असतानाच आपल्या पुरोगामी महाराष्ट्रात आजही दलितांना पाण्यासाठी कसे लढावे लागते, हे सांगताना त्यांनी काही घटना उदाहरणादाखल सांगितल्या. हल्लीचे 'खासगीकरण' म्हणजे दलितांना पाणी नाकारण्यासाठी महाडचे तळे खासगी असल्याचा दावा करण्यामागील युक्तीचेच अनुकरण आहे, असे ज्येष्ठ पत्रकार दिवाकर शेजवळ यांनी आपल्या भाषणात सांगितले. समता अभियानतर्फे महाड क्रांतीचा महोत्सव राज्यभरात साजरा करण्यासाठी गजानन शिरसाट, नामदेव साबळे, राजू रोटे, प्रमोद नाईक, संजय कांबळे, अ‍ॅड. जालिंदर यादव, सतीश डोंगरे, अशोक कांबळे यांनी पुढाकार घेतला आहे.
एक ओंजळ समतेसाठी या उपक्रमांतर्गत महाड चवदार तळे शताब्दी सोहळ्यानिमित्त मुंबई मराठी पत्रकार संघात चवदार तळ्यातील पाणी ओंजळीत घेऊन समतेची शपथ घेतली गेली. यात अभिनेते किरण माने, मुंबई मराठी पत्रकार संघाचे अध्यक्ष संदीप चव्हाण, समान संधी अभियानाचे अध्यक्ष सुनील कदम, ज्येष्ठ पत्रकार दिवाकर शेजवळ, मुंबई विद्यापीठाचे डॉ. सुंदर राजगीर, माजी खासदार हुसेन दलवाई, साहित्यिक अर्जुन डांगळे, अविनाश कोल्हे उपस्थित होते.
0 टिप्पण्या