गौरी- गणपती सणासाठी ग्रुप पद्धतीने आपल्या गावी जाण्याऱ्या गणेशभक्त प्रवाश्याना अतिरिक्त ३०% प्रवासी भाडे आकारले जाणार आहे. यापूर्वी दिनांक १७/०७/२०२६ पासून १३. ५% कायमस्वरूपी प्रवासी भाडे वाढ करण्यात आली होती. आता गौरी-गणपती सणास ग्रुप पद्धतीने गावी जाणाऱ्या गणेशभक्त प्रवाश्याना कायम स्वरूपी झालेली १३. ५०% प्रवासी भाडे वाढ अधिक अतिरिक्त ३०% प्रवासी भाडे वाढ मिळून ४३. ५०% भाडे वाढ सोसावी लागणार आहे. या भाडेवाढीचा गणेशभक्त कोकणवासिय प्रवासी संघाकडून जाहिर निषेध आज मुंबईत करण्यात आला. याबाबत मुंबई मराठी पत्रकार भवन येथे झालेल्या पत्रकार परिषदेत संघाचे कार्याध्यक्ष दीपक मा. चव्हाण यांच्यासह अनेक पदाधिकारी उपस्थित होते.
. प्रवासी संघाच्या माध्यमातून ७०० पेक्षा जास्त गाड्यांचे नियोजन झाले असून सदर नियोजन एस टी महामंडळाकडे दिले आहे. एस. टी. च्या नियोजना प्रमाणे ग्रुप बुकिंग १ ऑगस्ट पासून व्हायला पाहिजे होते. पण ग्रुप धारकांना ३०% अतिरिक्त भेट एस. टी. महामंडळाकडून द्यायची होती. त्यामुळे ग्रुप बुकिंग २०/२२ दिवस पुढे ढकलावे लागले.ही अतिरिक्त प्रवासी भाडे वाढ केल्याची माहिती जाहीर पणे किंवा प्रसिद्धी माध्यमातून देण्यास व्यवस्थापकीय संचालक यांची हिम्मत झाली नाही, म्हणून अंतर्गत सूचना देऊन ग्रुप बुकिंग करण्यासाठी गेलेल्या प्रवाश्याना प्रवासी भाडे वाढीचा झटका दिला. गणेशभक्त कोकणवासिय प्रवासी संघाने याचा जाहीर निषेध करून ग्रुप आरक्षण थांबाविले. मान. प्रताप सरनाईक, परिवहन मंत्री महाराष्ट्र राज्य तथा अध्यक्ष एस. टी. महामंडळ यांना निवेदन दिले असून त्यांची प्रत्यक्ष भेटही घेतली आहे. त्याच प्रमाणे मान. उदय सामंत, पालक मंत्री रत्नागिरी जिल्हा यांचीही भेट घेऊन निवेदन दिले आहे. ३०% अतिरिक्त प्रवासी भाडे वाढीचा मंत्री महोदय फेर विचार करतील अशी आशा यावेळी व्यक्त करण्यात आली. आणि तसे न केल्यास तीव्र आंदोलन करण्याचा इशारा गणेशभक्त कोकणवासिय प्रवासी संघाने दिला आहे.
0 टिप्पण्या