मुंबई महापालिकेच्या निवडणुकीत जागा वाटपावेळी ठाकरेंच्या शिवसेनेला अधिकाधिक जागा देऊन अगदी मोजक्या जागांवर मनसेने निवडणूक लढवली. त्यावेळी कुठलाही आग्रह मनसेने केला नाही किंवा जागा वाटपाच्यावेळी पेच निर्माण केला नाही. त्यामुळे आता तीन जागांपैकी एक स्वीकृत नगरसेवकाची जागा मनसेसाठी सोडावी, असं मत मनसेच्या काही नेत्यांकडून व्यक्त करण्यात आला आहे. ठाकरेंच्या शिवसेनेच्या वाट्याला निवडून आलेल्या नगरसेवकांमध्ये तीन स्वीकृत नगरसेवक मुंबई महापालिकेमध्ये देता येणार आहेत. या तीन पैकी दोन नगरसेवक हे ठाकरेंच्या शिवसेनेचे आणि एक नगरसेवक मनसेचा असावा असं मनसेच्या नेत्यांचा आग्रह असल्याची सूत्रांची माहिती आहे. मुंबई महापालिकेत विविध पदावर निवडून आलेले सहा नगरसेवकांना संधी मिळावी त्यासोबतच स्वीकृत नगरसेवक मिळावा यासाठी ठाकरेंच्या शिवसेनेसोबत चर्चा करून निर्णय घ्यावा, अन्यथा इतर प्रस्तावांचा सुद्धा विचार केला जावा, असेही मत मनसेच्या बैठकीत मांडण्यात आल्याची सूत्रांची माहिती आहे.
स्वीकृत नगरसेवक हा महापालिकेच्या सर्वसाधारण सभेतील एक विशेष सदस्य असतो. त्याची निवड थेट जनतेद्वारे होत नाही. शहरातील अनुभवी, कार्यकुशल आणि विविध क्षेत्रात (प्रशासन, कायदा, आरोग्य, अभियांत्रिकी, शिक्षण, सामाजिक सेवा इ.) योगदान देणाऱ्या व्यक्तींना ही संधी दिली जाते. निवडणूक आयोगाच्या मार्गदर्शक तत्त्वांनुसार शासकीय अधिकारी, वकील, डॉक्टर, अभियंते, शिक्षक, प्राध्यापक, प्राचार्य तसेच सामाजिक क्षेत्रात काम करणाऱ्या व्यक्तींचा यात समावेश अपेक्षित असतो.
0 टिप्पण्या