खाद्यतेलाच्या नावाखाली बेकायदेशीर डिझेलची वाहतूक... लाखोचा मुद्देमाल हस्तगत

मुंबई-नाशिक महामार्गावरील खारेगाव आणि कसारा परिसरामध्ये प्रशासनाकडून बेकायदेशीर इंधन वाहतुकीविरोधात जोरदार मोहीम उघडण्यात आली आहे.   या  मोहीमेत  कसारा पोलीस ठाणे हद्दीत 'एडिबल ऑईल' म्हणजेच खाद्यतेलाच्या नावाखाली बेकायदेशीररीत्या डिझेलची वाहतूक करणारा एक मोठा टँकर जप्त करण्यात आला आहे. या कारवाईत पोलिसांनी तब्बल ४१ लाख २६ हजार २४० रुपयांचा मुद्देमाल हस्तगत केला असून टँकर चालक आणि मालकाविरुद्ध गुन्हा दाखल करण्यात आला आहे.

      अपर पोलीस अधीक्षक (ठाणे ग्रामीण) यांच्या आदेशानुसार मुंबई-नाशिक महामार्गावरील चिंतामणवाडी पोलीस चौकीसमोर पोलिसांची नाकाबंदी सुरू होती. यादरम्यान नाशिकच्या दिशेने एका टँकरमधून अवैधरीत्या पेट्रोलियम इंधनाची वाहतूक होणार असल्याची गुप्त माहिती शहापूर विभागाच्या उपविभागीय पोलीस अधिकाऱ्यांमार्फत कसारा पोलीस ठाण्याचे प्रभारी अधिकारी पोलीस निरीक्षक सुरेश गावीत यांना मिळाली. या माहितीच्या आधारे पोलीस पथकाने पहाटे ३:४० वाजण्याच्या सुमारास मुंबई बाजूकडून येणारा संशयास्पद टँकर (क्रमांक MH-46-BU-2388) बॅरिकेडिंग करून थांबवला. टँकर चालक आसिफ करीम सय्यद (रा. पिंप्री, जि. सोलापूर) याच्याकडे चौकशी केली असता, टँकरमध्ये डिझेल असल्याचे त्याने कबूल केले. हे डिझेल त्याने टँकर मालक श्यामसुंदर अंगद दहिफळे (रा. कळंबोली, पनवेल) याच्याकडून गडचिरोली येथील सुरजागड खाणीत विक्रीसाठी नेण्यासाठी ताब्यात घेतले होते. या वाहतुकीबाबत कोणत्याही परवानग्या किंवा वैध कागदपत्रे नसल्याने ही वाहतूक पूर्णपणे अवैध असल्याचे निष्पन्न झाले.

       यानंतर शहापूर महसूल कार्यालयाच्या पुरवठा लिपिक नम्रता वाळू वरकुटे आणि पंचांच्या समक्ष टँकरची तपासणी करण्यात आली. टँकरच्या कप्प्यांमध्ये ९०.५६ रुपये प्रति लिटर दराचे एकूण २९,००० लिटर बेकायदेशीर डिझेल आढळून आले. पोलिसांनी २६ लाख २६ हजार २४० रुपये किमतीचे डिझेल आणि १५ लाख रुपये किमतीचा टँकर असा एकूण ४१ लाख २६ हजार २४० रुपयांचा मुद्देमाल जप्त केला आहे. 

      कोणतेही वैध मापदंड किंवा करारनामा न करता, थेट पेट्रोल पंपावरून डिझेल भरून नागरिकांच्या जीवितास धोका निर्माण होईल अशा पद्धतीने ही धोकादायक वाहतूक केली जात होती. या प्रकरणी पोलीस हवालदार सुनील दत्तात्रेय थाळेकर यांच्या फिर्यादीवरून चालक आणि टँकर मालकाविरुद्ध भारतीय न्याय संहिता (BNS) २०२३ आणि अत्यावश्यक वस्तू अधिनियमाच्या विविध कलमांन्वये कसारा पोलीस ठाण्यात गुन्हा दाखल करण्यात आला असून पोलीस निरीक्षक सुरेश गावीत पुढील तपास करत आहेत.

याच मोहीमेअतर्गत मुंबई-नाशिक महामार्गावरील खारेगाव टोलनाक्याजवळ ठाणे शहर गुन्हे शाखा घटक-१ आणि शिधावाटप विभागाच्या संयुक्त पथकाने  खाद्यतेलाच्या नावाखाली बेकायदेशीररीत्या डिझेल सदृश ज्वलनशील पदार्थाची वाहतूक करणारा एक मोठा टँकर  जप्त केला असून या कारवाईत तब्बल ४६ लाख ५० हजार रुपयांचा मुद्देमाल हस्तगत करण्यात आला आहे. लोकांची दिशाभूल करण्यासाठी संबंधित टँकरवर 'ईडीबल ऑईल' (खाद्यतेल) असे लिहिण्यात आले होते. या प्रकरणी मुख्य आरोपी चालकासह एकूण ८ जणांविरुद्ध कळवा पोलीस ठाण्यात गुन्हा दाखल करण्यात आला आहे.

      गुन्हे शाखा घटक-१ ला मिळालेल्या गोपनीय माहितीच्या आधारे खारेगाव टोलनाक्याच्या अगोदर, मुंब्रा वळण रस्त्याजवळ सापळा रचण्यात आला होता. या ठिकाणी संशयास्पद टाटा कंपनीचा टँकर (क्रमांक MH-46-BB-7134) थांबवून त्याची तपासणी केली असता, त्यात मोठ्या प्रमाणात ज्वलनशील द्रव पदार्थ आढळून आला. टँकर चालकाकडे या डिझेल सदृश पदार्थाची वाहतूक करण्याचा कोणताही परवाना, खरेदी बिल किंवा वैध कागदपत्रे नव्हती. प्रकरणाचे गांभीर्य ओळखून उपनियंत्रक शिधावाटप विभाग, ठाणे यांच्या आदेशानुसार शिधावाटप अधिकारी श्री. सुभाष रामनाथ डुंबरे व त्यांच्या पथकाला तातडीने घटनास्थळी पाचारण करण्यात आले. 

      या संयुक्त तपासणीत टँकरच्या ५ कप्प्यांमध्ये एकूण २५,००० लिटर बेकायदेशीर डिझेल सदृश पदार्थ आढळून आला. जप्त करण्यात आलेल्या मुद्देमालामध्ये २४ लाख ५० हजार रुपये किमतीच्या २५,००० लिटर डिझेल सदृश पेट्रोलियम पदार्थाचा आणि २२ लाख रुपये किमतीच्या टाटा टँकरचा समावेश आहे. नियमानुसार तपासणी अधिकाऱ्यांनी घटनास्थळावरून रासायनिक चाचणीसाठी नमुने गोळा केले असून, टँकर व इतर मुद्देमाल पोलिसांच्या स्वाधीन केला आहे.

      प्राथमिक तपासणीत महत्वाची माहिती समोर आली असून सर्व आरोपींनी स्वतःच्या आर्थिक फायद्यासाठी संगनमत करून विरार खाडीच्या किनारी बोटीमधून आणलेले डिझेल टँकरमध्ये भरले होते आणि ते नाशिकच्या दिशेने घेऊन जाण्याचा त्यांचा बेत होता. पेट्रोलियम पदार्थांची वाहतूक करण्याचे कोणतेही वैध मापदंड न पाळता, सामान्य टँकरमधून अशी धोकादायक वाहतूक करून नागरिकांच्या जीवितास मोठा धोका निर्माण करण्याचे कृत्य आरोपींनी केले आहे. या प्रकरणी मुख्य आरोपी चालक धर्मेंद्रकुमार श्यामलाल पटेल (वय ३७ वर्षे, रा. वाशी, नवी मुंबई) याला अटक करण्यात आली आहे. तसेच टँकर मालक रितेश अभय नारायण सिंग (रा. दिवा, ठाणे) यांच्यासह पालघर व सुरत येथील रोशन शिरोडकर, नितीन कोली, राजू पंडित, दीपक पवार, सागर पाटील आणि अनिल सुरत या इतर ७ साथीदारांची नावे निष्पन्न झाली आहेत. 

      शिधावाटप अधिकारी. सुभाष रामनाथ डुंबरे यांच्या फिर्यादीवरून सर्व आरोपींविरुद्ध जीवनावश्यक वस्तू कायदा १९५५, मोटार स्पीरीट अँड हायस्पीड डिझेल ऑर्डर २००५ आणि बायोडिझेल धोरण २०२१ च्या विविध कलमांन्वये गुन्हा नोंदवण्यात आला असून पोलीस निरीक्षक अशोक रावजी उतेकर या गुन्ह्याचा पुढील तपास करत आहेत.

    या मोठ्या कारवाईच्या पार्श्वभूमीवर जिल्हाधिकारी डॉ. श्रीकृष्ण पांचाळ आणि जिल्हा पुरवठा अधिकारी सर्जेराव मस्के-पाटील यांनी ठाणे जिल्ह्यातील जनतेला जाहीर आवाहन केले आहे की, जिल्ह्यात डिझेल व तत्सम इंधनाचा पुरेसा साठा उपलब्ध असून नागरिकांनी घाबरून जाण्याचे कोणतेही कारण नाही. जनतेने कोणत्याही प्रकारचा अतिरिक्त इंधन साठा करून ठेवू नये आणि इंधनाच्या तुटवड्याबाबत पसरणाऱ्या कोणत्याही अफवांवर विश्वास ठेवू नये.अवैध वाहतूक करणाऱ्याविरुद्ध प्रशासनाकडून अत्यंत कडक कायदेशीर कारवाई केली जाईल, असा इशाराही जिल्हा प्रशासनाने दिला आहे.