धारावीमधील प्रत्येक झोपडपट्टीवासियास 500 चौ. फू.चे घर मिळालेच पाहिजे. याचे लेखी आश्वासन सरकार-अदानी कंपनीने द्यावे यासाठी 4 एप्रिल रोजी सकाळी 11 वाजता रखरखत्या उन्हात धारावीकरांनी एक विशाल मोर्चा वांद्रे पूर्व येथील झोपडपट्टी पुनर्विकास प्राधिकरणावर (एसआरए) काढला. अदानी कंपनी विरोधात झोपडपट्टीवासियांमध्ये असंतोष-नाराजी खदखदत आहे. या नाराजीचा स्फोट धारावी बचाव आंदोलन या संघटनेने काढलेल्या या मोर्चातून होऊ नये यासाठी 300 हून अधिक पोलिसांचा प्रचंड बंदोबस्त ठेवण्यात आला होता. मात्र 'संपूर्ण धारावी पात्र, गौतम अदानी केवल अपात्र' घोषणेमुळे संपूर्ण परिसर दणाणून गेला होता.
यानंतर अंबादास दानवे यांच्यासह 25 जणांचे शिष्टमंडळ पोलीस आणि खाजगी वाहनांमधून एसआरए कार्यालयांवर रवाना झाले. मात्र एसआरए कार्यालयावरही आधीच आलेल्या मोर्चेकऱयानी कोणत्याही प्रकारे अदानी विरोधात उद्रेक करू नये यासाठी या ठिकाणीही पोलिसांनी प्रचंड बंदोबस्त लावला होता.
अनिल देसाई, बाबूराव माने, ज्योती गायकवाड, वर्षा गायकवाड, महेश सावंत, श्रध्दा जाधव यांनी धारावी बचाव आंदोलन या संघटनेच्या वतीने एक निवेदन एसआरएचे मुख्य कार्यकारी अधिकारी महेंद्र कल्याणकर यांना सादर केले. मोर्चातील शिष्टमंडळाचे म्हणणे एसआरएचे प्रमुख महेन्द्र कल्याणकर यांनी ऐकून घेतले. तसेच सदर मागण्याबाबत धारावी बचाव आंदोलन या संघटनेसोबत एक बैठक घेण्याचे आश्वासनही कल्याणकर यांनी यावेळी दिले.
आमदार महेश सावंत यावेळी म्हणाले अदानी समूहाच्या मे. नवभारत मेगा डेव्हलपर्स प्रायव्हेट लिमिटेड या कंपनीने धारावीतील प्रत्येक झोपडपट्टीवासियाबरोबर एग्रीमेंट करावे, करार करावा. तसेच धारावी मेघवाडीत बिल्डिंगचे काम रात्रीही सुरू असते. त्याचा त्रास आजूबाजूला राहणाऱया लोकांच्या झोपेवर होत असल्याने मेघवाडीतील रात्रीच्या कामावर बंदी घालावी.
आमदार अंबादास दानवे म्हणाले धारावीकरांबरोबर पात्र- अपात्रेच्या खेळ करीत बसू नका. धारावी हे श्रमिकांचे नगर असून सर्वांनाच या धारावीतच घरे द्या. कोणालाही धारावी बाहेर घर देण्याचे मनात आणू नका. नाही तर या विरोधात शिवसेना ठाकरे गट उद्रेक केल्याशिवाय राहणार नाही असा इशाराही अंबादास दानवे यांनी यावेळी दिला.
धारावी बचाव आंदोलनाचे नेते माजी आमदार बाबुराव माने म्हणाले धारावीला अदानी कंपनीने आपल्या सोयीचे खेळणे बनवले आहे. ज्या जमिनीवर एसआरए प्रकल्प तेथेच झोपडपट्टीचा विकास हे सूत्र आहे. पण अदानी आले आणि अजब नियम आले. झोपडपट्टी धारावीत. पण अदानी कंपनीस जमीन दहिसर,मुलुंड देवणारला हे विसंगत आहे. जेथे जमीन तेथेच झोपडपट्टीचा विकास हे सूत्र मोडू नका. सर्व पात्र-अपात्र धारावीकरांना घराला घर, दुकानाला दुकान मिळाले पाहिजे. नाहीतर येथील संतप्त लोक एकही विट अदानी कंपनीला येथे रचू देणार नाही असा इशाराही माने यांनी यावेळी दिला.
अदानी ग्रुप कंपनीतील लोक गुंडगिरी करीत आहेत. ही गुंडगिरी त्वरित थांबवा अशी मागणी खासदार वर्षा गायकवाड यांनी यावेळी केली. पूर्वी एफएसआय चार असताना एसआरएमध्ये लोकांना घरे मिळत होती, आता अदानी कंपनीस घसघशीत बारा एफएसआय मिळालेला आहे. म्हणून त्यांनी धारावीत सर्व पात्र अपात्र लोकांना प्रत्येकी 500 चौरस फूटाचे घरे द्यावीत अशी मागणीही वर्षा गायकवाड यांनी केली.तसेच धारावी मध्ये सध्या अस्तित्वात असलेली सर्वधर्मीयांची प्रार्थनास्थळे ही आबाधित राहिली पाहिजे.त्यांना धक्का लागता कामा नये.
2011च्या नियमानुसार धारावीकरांना पात्र केले पाहिजे. सर्वांना 500 चौरस फुटाची घरे दिली पाहिजेत. यात कंजूशी करू नये, ही भूमिका हीरहिरीने आमदार ज्योती गायकवाड यांनी मांडली.
राष्ट्रवादी काँग्रेस शपचे स्थानिक अध्यक्ष उलेश गजाकोश म्हणाले आमच्या मागण्यानुसार प्रत्येक झोपडपट्टीवासियास धारावीतच 500 फुटाचे चौरस फुटाचे घर धारावीतच मिळाले पाहिजे. यासाठी सरकारने नवीन जीआर काढावा. तर समाज सेवक गणेशभाऊ खेडेकर यांनी पहिल्या माळ्यावर राहणाऱयांना देखील धारावीतच 500 चौ. फुटांचे घर मोफत मिळालेच पाहिजे अशी मागणी करत अदानीच्या दडपशाहीला धारावीकर भिक घालणार नाही असा इशारा दिला.
0 टिप्पण्या