टीईटी पेपरफुटी प्रकरणी बाळासाहेब आंबेडकर आणि शिक्षणमंत्री दादा भुसे यांची मंत्रालयात बैठक

 वंचित बहुजन आघाडीचे राष्ट्रीय अध्यक्ष बाळासाहेब आंबेडकर आणि शिक्षणमंत्री दादा भुसे यांची आज मंत्रालयात टीईटी पेपरफुटी प्रकरणी विद्यार्थ्यांच्या उर्वरित मागण्यांवर अधिकृत बैठक पार पडली. शालेय शिक्षण विभागाचे प्रधान सचिव आणि अधिकारी बैठकीत उपस्थित होते.टीईटी पेपरफुटी प्रकरणी सम्यक विद्यार्थी आंदोलनाने शिक्षणमंत्री दादा भुसे यांच्या मालेगाव येथील निवासस्थानी आंदोलन केले होते. त्यानंतर ४ जुलै रोजी सम्यक विद्यार्थी आंदोलन आणि शिक्षणमंत्री दादा भुसे यांच्यासोबत झालेल्या बैठकीत १२ मागण्यांचे निवेदन शिक्षणमंत्र्यांना देण्यात आले होते. १३ जुलै रोजी पुन्हा शिक्षणमंत्र्यांच्या सोबत बैठक झाली. त्यांनी १२ मागण्यांपैकी ८ मागण्या मान्य केल्या होत्या. आज उर्वरित मागण्यांच्या संदर्भात वंचित बहुजन आघाडीचे राष्ट्रीय अध्यक्ष बाळासाहेब आंबेडकर यांच्यासोबत बैठक झाली.

टीईटी पेपरफुटी प्रकरणातील आरोपींवर कठोर कारवाई करण्यात यावी, परीक्षा पारदर्शक व्हावी, पेपरफुटीला आळा घालण्यासाठी राज्याच्या मुख्य सचिवांच्या अध्यक्षतेखाली समिती गठन करण्यात आली आहे. पेपर फुटीमध्ये आढलेल्या अधिकारी, कर्मचाऱ्यांची गय केली जाणार नाही. टीईटी परीक्षेत पारदर्शकता आणि शिस्तबद्धता येण्यासाठी ऑनलाइन परीक्षा घेता येईन का? याची चाचपणी व IBPS संस्थेशी चर्चा करावी. आर्थिक मागास आणि वंचित घटकांतील विद्यार्थ्यांच्या शिष्यवृत्ती आणि विद्यावेतन त्यांच्या खात्यात वेळेवर जमा करण्याचा विषय हा समाज कल्याण, आदिवासी विकास विभागाशी निगडित आहे. त्यासाठी त्या विभागाशी विचार विनिमय करून विद्यार्थ्यांना वेळेवर शिष्यवृत्ती मिळवण्यासाठी मदत केली जावी. तसेच शिक्षण सेवकांच्या मुद्द्यांवर चर्चा झाली.