विकासाच्या नावाखाली वृक्ष आणि कांदळवनांची कत्तल थांबवा. पाणीप्रश्न आणि मूलभूत सुविधा सोडवण्याला प्राधान्य द्या, तसेच रस्ते खड्डेमुक्त आणि पदपथ अतिक्रमणमुक्त करा. मूलभूत सुविधा सोडवण्याला प्राधान्य द्या अशा घोषणा देत ठाणेकरांनी पुन्हा एकदा प्रस्तावित ‘ठाणे इंटिग्रल रिंग मेट्रो’ला विरोध दर्शवत पावसातही रस्त्यावर निदर्शने केली. गेल्या आठवड्यात झालेल्या स्वाक्षरी मोहिमेनंतर पोखरण रोड क्रमांक २ येथे स्वामी जंक्शन ते प्रशांत कॉर्नरदरम्यान नागरिकांनी मानवी साखळी करून प्रकल्पाविरोधात रोष व्यक्त केला. आंदोलनात शहरातील मान्यवर, व्यावसायिक आणि पर्यावरणप्रेमी सहभागी झाले. ‘ठाणे अगेन्स्ट इंटिग्रल रिंग मेट्रो’ या नागरिक मंचाच्या वतीने अ‍ॅड. राधिका राणे आणि आदेश मेहरोत्रा यांच्या नेतृत्वाखाली या आंदोलनाचे आयोजन करण्यात आले होते.
प्रस्तावित ठाणे इंटिग्रल रिंग मेट्रो प्रकल्प सध्याच्या स्वरूपात तत्काळ रद्द करावा. मेट्रो मार्गिका ४ आणि ५ आधी सुरू करून प्रवाशांचा प्रतिसाद पाहिल्यानंतरच ठाण्यात दुसऱ्या मोठ्या मेट्रो प्रकल्पाचा विचार करावा, अशी मागणी आंदोलकांनी केली. मंजूर ३०३ पैकी केवळ १२३ इलेक्ट्रिक बसेस खरेदी करण्यात आल्याचा दावा करत उर्वरित १८० बसेस त्वरित खरेदी करण्याची मागणीही यावेळी करण्यात आली.
0 टिप्पण्या