वांद्रे (पश्चिम) येथील हिल रोड परिसरातील ‘सागर एलिगन्स’ इमारतीच्या सुरू असलेल्या कथित बेकायदेशीर पाडकामावर आक्षेप घेत, रहिवाशांना पर्यायी निवास, कायदेशीर करार आणि संरक्षणाची हमी दिल्याशिवाय पाडकाम करू नये, अशी मागणी रिपब्लिकन पार्टी ऑफ इंडिया (आठवले)च्या कायदेशीर व कामगार तक्रार निवारण कक्षाचे महाराष्ट्र अध्यक्ष ॲड. विजय एस. ठाकूर यांनी केली. सागर एलिगन्समधील पाडकामामुळे रहिवाशांच्या जीविताला धोका निर्माण झाला असून, बिल्डरकडून रहिवाशांवर दबाव आणला जात असल्याचा आरोप येथील रहिवाशी पॅट्रिक डिसोझा यांनी केला.
याप्रकरणी ॲड. ठाकूर यांनी मुंबई प्रेस क्लब येथे पत्रकार परिषद घेतली. “इमारत पाडण्यास आमचा विरोध नाही. मात्र, आधी पर्यायी घर द्या, योग्य करार करा आणि रहिवाशांचे संरक्षण सुनिश्चित करा; त्यानंतरच पाडकाम करा अशी येथील रहिवाशांची मागणी असताना, मात्र बिल्डर प्रशासनाच्या माध्यमातून येथील रहिवांशाना बेघर करत असल्याचा आरोप ॲड. ठाकूर यांनी केला आहे.
रहिवाशांना पाणीपुरवठा बंद करण्यात आला असून वीजपुरवठा तोडण्याची धमकी दिल्याचाही आरोप पत्रकार परिषदेत करण्यात आला. त्यामुळे ज्येष्ठ नागरिकांसह रहिवाशांमध्ये भीतीचे वातावरण निर्माण झाले आहे.
या प्रकरणी महापालिका व पोलिसांकडे वारंवार तक्रारी करण्यात आल्या आहेत. २०२५ आणि २०२६ मध्ये मुंबई उच्च न्यायालयात याचिका दाखल केल्याचेही ठाकूर यांनी नमूद केले. १८ ऑगस्ट २०२६ रोजी महापालिका मुख्यालयात पत्र देऊनही अपेक्षित दखल घेतली नसल्याचा दावा ठाकूर यांनी
केला. पाडकामासंदर्भातील महापालिकेच्या परवानग्या, कागदपत्रे आणि संपूर्ण प्रक्रियेची चौकशी करून कारवाई थांबवावी, अशी मागणी करत महापालिका आयुक्त, मुंबई पोलीस आयुक्त आणि मुख्य सचिवांच्या प्रतिनिधींची तातडीने बैठक घेऊन रहिवाशांच्या प्रश्नावर तोडगा काढावा, पुनर्वसनासाठी अत्यल्प क्षेत्रफळाच्या घरांचा प्रस्ताव असल्याचा आरोप करत, वांद्रेसारख्या परिसरात रहिवाशांना किमान ५०० ते ५५० चौरस फुटांची घरे मिळावीत, मागील 29 वर्षापासून या रहिवांशांची परवड होत असून त्यांना त्वरीत न्याय मिळावा अशी मागणी ॲड. ठाकूर यांनी केली.
0 टिप्पण्या